Urwego rw’ikawa mu Rwanda rwongeye gukora amateka nyuma y’uko ikawa yihariye (specialty coffee) y’uruganda K-Organics Ltd rwo mu Karere ka Huye, Intara y’Amajyepfo, igurishijwe ku giciro cya $88.18 (ni hafi Frw 130,000) ku kilo mu cyamunara cyabereye kuri interineti ku wa 8 Ukwakira 2025.
Nk’uko byatangajwe n’Ikigo cy’Igihugu gishinzwe guteza imbere ibikomoka ku buhinzi mu bucuruzi hanze (NAEB), iki giciro ni incuro 14 hejuru y’igiciro gisanzwe cy’export y’ikawa y’u Rwanda.
Ni na none hejuru ya 22.8% ugereranyije n’icyo uruganda NOVA Coffee Ltd rwo mu Karere ka Gicumbi rwari rwarigeze kugeraho muri 2024, aho ikawa yarwo yagurishijwe kuri $71.8 ku kilo.
NAEB yatangaje ko yishimiye gutangaza ibyavuye mu cyamunara cya kabiri cyiswe Best of Rwanda 2025 Specialty Coffee Competition, aho ibicuruzwa 20 bya mbere by’inyongera (top 20 coffees) byageze ku biciro bitigeze biboneka mbere, ikawa ya K-Organics Ltd ikaza ku isonga.
Muri rusange, iki cyamunara cyinjije asaga $304,000 (arenga Frw 440 miliyoni) zivuye mu kugurisha ibilo 11,210 by’ikawa, igurwa n’abaguzi baturutse mu bihugu bitandukanye birimo Arabiya Sawudite, Leta Zunze Ubumwe z’Abarabu, Ubufaransa, Amerika, Koreya y’Epfo, Ubuyapani, Tayilande, Hong Kong, Afurika y’Epfo, Ubugiriki, Polonye, Ubudage, n’Ubwongereza.
Umusaruro ugaragaza imbaraga z’abahinzi b’ikawa b’Abanyarwanda
Evariste Karangwa, uhagarariye K-Organics Ltd, yavuze ko yishimiye cyane kuba ikawa yabo ari yo yagurishijwe ku giciro cyo hejuru kurusha izindi.
Yagize ati:
“Ni ishema rikomeye kubona ikawa yacu itsindira igiciro cya mbere. Ibi ni ikimenyetso cy’ubwitange n’imbaraga dushyira mu gukora ikawa y’ubuziranenge. Iyi ntsinzi izamfasha kongera ishoramari mu buhinzi bw’ikawa no guteza imbere imibereho y’abaturage b’iwacu binyuze mu ikawa.”
Ikawa y’u Rwanda irushaho kumenyekana ku rwego mpuzamahanga
Irushanwa Best of Rwanda Specialty Coffee Competition, ryari rigeze ku nshuro ya kabiri, rigamije kumenyekanisha ikawa nziza cyane iva mu bice bitandukanye by’igihugu.
Ikawa 20 zagurishijwe mu cyamunara zatoranyijwe muri sample 316 zari zoherejwe, zose zicishwa mu ntambwe eshatu z’igeragezwa ry’impumuro n’ibyiyumviro by’abahanga bo mu Rwanda n’ab’amahanga.
NAEB yavuze ko iyi ntsinzi igaragaza ubuhanga n’ubuziranenge bw’ikawa y’u Rwanda, ariko kandi igafasha kongera agaciro n’imibereho myiza y’abahinzi.
Ibyinjijwe muri icyo cyamunara bizafasha abahinzi gushora imari mu ikoranabuhanga mu buhinzi bw’ikawa, kongera umusaruro no kurushaho kuzamura ireme ry’imbuto z’ahazaza.
Claude Bizimana, Umuyobozi Mukuru wa NAEB, yagize ati:
“Ibyagezweho uyu munsi ni isomo rikomeye ritwibutsa ubushobozi dufite iyo dukoranye nk’abaturage, abahinzi, abohereza n’abaguzi. Buri cyamunara ni ikimenyetso cy’uko ikawa y’u Rwanda ifite agaciro, kandi ari ishoramari mu hazaza h’urwego rw’ikawa mu gihugu.”
Yashimiye kandi abaguzi b’amahanga bitabiriye Best of Rwanda Online Auction 2025, bagira uruhare mu kumenyekanisha ikawa y’u Rwanda ku rwego mpuzamahanga.
Ugereranyije n’imyaka yabanje, icyamunara cyo mu 2025 cyinjije amafaranga arenga $304,000 ugereranyije na $165,000 avuye mu kugurisha ibilo 6,600 mu cyamunara cyabanje — bigaragaza izamuka rikomeye ry’isoko n’agaciro k’ikawa y’u Rwanda.
About The Author
